今年「婦女銀袋賽」提前舉行，由「莎莎」贊助，莎莎老闆郭少明此日大出風頭，喺馬場受美女前呼後擁，威過威士忌。其實莎莎喺上星期日嘅贊助費、禮物費、全日餐飲費，二百萬應該有找（據馬主Ｎ估計），但在馬場賣廣告賣足七小時（上午十一點到晚上六點），六萬二千幾人入場睇到，呢筆費用夠晒抵，莎莎郭出年應該再贊助。其實「婦女銀袋」已有幾十年歷史，𠵱家先至有女性產品公司贊助，算唔算後知後覺？
人多入場，投注額都多番，去到九億一千三百萬元，但係三Ｔ投注只得九百二十八萬，似乎略低，今季啲三Ｔ賽事投注唔夠熱烈，有乜嘢原因呢？見到大注Ｃ，問佢有乜見解，大注Ｃ話：「好容易啫，去季設立兩個安慰獎（即三Ｔ場合，任中兩關）後，啲安慰獎分薄晒，表面上有益大眾，但對啲大注人士嚟講，條數計唔掂。以前我哋第一關，第二關用大包圍投注方式，隨時用七至八隻，其中有大冷門，複式投注，博中安慰獎，有冷爆就和味，尾關用五隻複式，一次三Ｔ，閒閒哋投注十萬至二十萬。但現在如果用呢個方法，就算中安慰獎都蝕到喊，所以我哋戒咗賭三Ｔ咯。我曾經有一季，收安慰獎收到手軟，賭錢要計回報率嘅，你左丁山下注，每注幾十蚊，幾百蚊，梗係唔理得咁多啦！」
俾大注Ｃ窒親，唔知點樣反駁。冇咗呢類大包圍賭注，三Ｔ投注額真係因咁樣而少咗？要研究吓。講番婦女銀袋日現場，有咗贊助，以粉紅色為主題，果然好有氣氛，唔少女士戴靚帽到沙圈亮相，夠晒搶鏡。不過有一項提議，希望莎莎郭明年請二十位靚女模特兒，以化裝品為名，如兩位「伊莉沙伯雅頓小姐」在「伊利莎伯讓賽」嗰場企喺沙圈，到咗「婦女銀袋錦標」嗰場，二十位模特兒同時出場行圈兩周，一定轟動，相信啲化裝品公司好願意出番一份模特兒出場費啫！