小初本來諗住呢排大跌市，細價股應該冇咩搞作，但噚日就有中民燃氣（681）話加入大陸彩票業戰團，但相比之前幾隻彩票股，氣勢明顯差得遠。
中民噚日復牌最高見0.43元，收0.41元，升7.9％，成交股數只有1282萬股，金額529萬元。
經紀陳話，單睇成交咁細，就知中民未成氣候，反而最早涉足國內彩票市場的金屬電子交易所（8161），雖然近排成交較之前縮減，但股價就繼續節節上升，昨日升3.96％，收2.625元，成交股數256萬股，金額670萬元。
另外，昨日有兩隻新股上市，最矚目係創業板股安瑞科控股（8289），首日掛牌收1.94元，比招股價1.50元高出29.33%，成交唔算細，金額3881萬元。
經紀黃話，唔好以為創業板股就睇小，隻股同芬佬愛股新奧燃氣（2688）同一個阿媽，唔少芬佬都有捧場，加上隻股係以全配售形式發售，25位承配人揸住街貨87％，街貨乾成咁，要升根本乜難度。
慕容小初