港股繼續反彈，中期調整是否到底，暫時仍未能確定，但只要未來兩三日大市轉穩，則到底的機會便會大增。
吉林化工（368）發完盈警，股價仍然上升，筆者一直都認為呢隻股票真係有「料」，目標價應在3元過外。另外，中資線近日大力扯吸中國海外（688），噚日收2.475元，已連升兩日，佢哋話第1個浪會見3元，中線則係3.50元。
近期上市的新股中，頗多寶藏，除新宇亨得利（3389）同中國永樂電器（503）外，中國雨潤食品（1068）亦可留意。雨潤10月3日上市，招股價3.70元，上市後高價4.075元，低價3.675元，噚日表現轉強，高收3.95元，升0.20元；上市至今已11日，相信消化整固已完成，亦可以「買定等升」。
算係半隻零售股
雨潤係肉商，係中國肉製品主要供貨商之一，提供多種生肉及豬肉製品，以集團品牌福潤、雨潤及旺潤等銷售，因此亦可算係半隻零售股。最重要嘅係，基金看好雨潤前景，紛紛成為策略股東，包括高盛、鼎暉投資及新加坡政府投資，分別持股6.75%、3.65%、3.46%。
雨潤發售4億股上市，集資淨額約12億元，其中約57%用於擴充產能，公司今年屠宰生豬約780萬隻，預期到2007年將增至1330隻；在肉製品方面，則會由今年年產16.6萬噸增至07年22萬噸。
由於超市在中國數目漸多，對冷鮮肉、冷凍肉及加工品需求亦大增，集團近兩年業績增長加速，03年（12月年結）營業額19.38億元（人民幣．下同），升26.3%，盈利9540萬元；04年營業額25.92億元，升33.7%，盈利1.69億元，升77.1%；05年首季營業額10.9億，同比升119.79%，獲利9420萬元，升130.3%。05年預測PE約16倍，仍遠低於中國零售同消費股的22倍，中期股價上升空間仍大。
雨潤噚日發力，唔排除係有基金在市場大手吸納。現時已入股的基金，高盛同新加坡政府投資都為人所熟悉，鼎暉投資則係曾經投資過同類消費股李寧（2331）及蒙牛乳業（2319），李寧同蒙牛上市後股價表現之勁，有目共睹。
郭兆誠