高官Ａ揸車去機場，當然走西隧及三號幹線，過咗隧道兩分鐘，高官Ａ見到右邊有一家新樓大廈外牆掛上四個大字，上書「曼克頓山」，嚇咗一驚，右邊應該係接近長沙灣深水埗區，點解會走咗一間「曼克頓山」出嚟？高官Ａ後來對左丁山講：「曼克頓山嘅英文名稱係乜，我唔知，直譯就係ManhattanHill，如果我話畀外國朋友聽我住喺ManhattanHill，佢哋點都唔會聯想到長沙灣噃！」
何止外國人，左丁山坐的士經過「曼克頓山」，的士司機見到，都嘆一句：「玩死；如果唔係經過呢度，第日乘客上車叫我去曼克頓山，我就會聯想到比華利山、渣甸山、壽臣山，撞鬼，點知曼克頓山會喺西九龍長沙灣！」
豪宅大廈名字，越來越出位，教人眼花撩亂。高官Ａ認為消費者委員會或者應該研究吓，大廈名稱及所在區域是否有誤導市民之嫌，睇樓盤廣告，好容易將香港啲分區位置搞錯晒！
左丁山就認為消委會唔應該乜都管，買樓人士拿真金白銀，八、九百萬、千幾萬嚟買所謂豪宅，應該將地盤所在地查清查楚，土瓜灣與何文田有別，火炭唔係位於九肚山麓，清水灣道好長好長，大冧把就喺郊野，細冧把近坪石邨，屬基層地區，如果知道晒之後，買家仍然鍾意買嘅話，佢嘅事咯，自己負晒責任，唔通買樓人士連自己住響邊區都唔知咩。
買豪宅除咗要睇地區之外，新興潮流係睇會所設施與風水。照計有錢買得起萬幾兩萬蚊一呎嘅豪宅嘅人士，應該係好多個會所如九龍塘會、中遊會、遊艇會嘅會員，唔會好恨有住宅會所，但風水之說，就人人都寧可信其有，不可信其無；𠵱家人人都講下元八運，由二○○四起至二○二三年止，識得風水嘅都話八運利西南方，唔通以後住在東方北方嘅人都冇運行？正是信不信由你。