雙「窗」C仔換新偈7個波好好砌

新版C230SportCoupe，跟原來版本好唔同，新車加有原廠EvolutionSportPackage作招徠，而原來的1.8公升直4Supercgarger引擎，亦已換上全新2.5公升V6型號（馬力204匹），起跑加速變得爽朗暢順，加埋一套新7前速7G-TRONIC半自動波箱，以雙門轎跑車作賣點，將會掀動一班年輕Fans換車熱潮！

記者、攝影：陳偉林
ImageGirl：Celine

本地中價歐洲轎跑車競爭好激烈，代理商不時要費盡心思，包裝唔同版本刺激銷量；最近，平治代理又在C-Class車系當中，推出全新一款C230SportCoupe版。新車除裝有一台輸出高達204匹的2.5公升V6引擎外，代理還加送全套原廠EvolutionSportPackage包圍，除有跑車化仕樣的全新鍍鉻鬼面罩、頭泵把連大型氣霸組合，還有17吋合金胎軨，令部車看來唔只神氣十足，跑起來更多一份轎跑車的辛辣味道。

■兩旁門邊電鏡連方向指揮燈，悅目又吸引。

■新版C230SportCoupe，造型有別傳統平治，加埋原廠EvolutionSportPackage，賣相相當吸引。

■平治C230SportCoupe全新引擎及波箱組合，性能比起舊有型號更突出。

V6引擎表現更勝從前

樣靚之餘，筆者最欣賞呢部SportCoupe新車的2.5公升V6引擎，馬力輸出高，引擎本身運轉亦見寧靜及暢順，低、中轉扭力表現較舊有柔韌有力，加速反應有過之而無不及。當日實地試車，筆者從港島銅鑼灣去赤柱方向，駛經蜿蜒多彎的山路時候，引擎的動力輸出表現源源不絕，難得走彎的循迹力高，制動器又收放自如，沿路行車唔再有Supercharger引擎帶來的高噪音滋擾。
再者，新車一套7前速7G-TRONIC半自動波箱，轉檔的順滑性亦較原有5前速半自動波箱勝一籌，重好啱走山路呢。

■特大首飾箱內置有多碟式CD盒，方便隨時換碟。

■闊落的尾廂夠實用，有需要的話，整幅尾排重可以收摺起來，令容量幾近倍增。

■鑲有銀白框邊的四圓表板設計，資料豐富又易於閱讀。

■三幅式真皮跑車軚環，兩旁備有免提電話及音響等遙控鍵。

■前排雙色皮椅配襯，富有十足承托力。

■取材自同廠E-Class的中控台，有齊左右恒溫冷氣、高級音響同免提電話，還有ESP開關鍵。

車廂設備講究享受

早前，Facelifted後的C-Class，車廂鋪排已趨於時尚，還帶出濃厚的轎跑車味道，而這輛C230SportCoupe追加有前排厚厚的雙色皮椅配襯，但欠電動調校的操控輔助，仍予人坐得貼服又有承托力，兼且還有防滑腳踏，配套直逼勇悍的意大利跑車。然而，車廂亦講求享受，如左右獨立Thermatic恒溫冷氣、CD音響同免提電話裝置，新版SportCoupe重有近乎天幕式玻璃天窗連電動簾組合，給人動靜皆宜的駕駛感。

平治C230SportCoupe規格

引擎：2496ccV6DOHC
馬力：204ps/6100rpm
扭力：25.0kgm/2900-5500rpm
傳動：7前速7G-TRONIC半自動波，後輪驅動
懸掛：（前）麥花臣支柱（後）多連桿
制動：（前）透氣碟（後）碟式（ABS）
輪胎：（前）225/45R17ContinentalSportContact2（後）245/40R17ContinentalSportContact2
尺碼：4343×1728×1406mm
軸距：2715mm；車重：1535kg
0-100公里：8.9秒；極速：234km/h
平均耗油：9.3-9.6L/100km
新車售價：$382,000(標準版)
車輛提供：仁孚行（28957339）