世紀二十一聯誠謝寶昭話，一個人造首飾商，九九年以近一百七十萬，買入藍田居屋康瑞苑，入住之後，公司規模愈做愈大，短短四年，做到返內地設廠，兼營批發、零售，賺大錢。到○三年，儲夠彈藥，一擲千二萬，買入紅磡海名軒二千三百呎豪宅，比舊居大兩倍。
四年兩度入市，由百零萬居屋，到千幾萬豪宅，業主深信係間居屋風水好，帶嚟財富，即使遷出兩年，都唔捨得賣，直至近期，仔女諗住買私人樓，佢至肯賣間風水屋，套現畀仔女做首期。
康瑞苑日前以一百五十六萬易手，每呎近二千，雖然蝕咗十幾萬，不過，如果呢間屋提早喺○三年賣，個價比𠵱家低一半。另外，住緊嘅海名軒，至今升值逾倍，來回賺咗千幾萬，所以話呢間康瑞苑係風水屋，都冇乜錯。
電郵地址：[email protected]