鄭少秋在無綫新劇《潮爆大狀》中，首度扮演律師，昨日秋官卻十分倒米，直指看完《潮》劇劇本後，覺得這個大狀不夠潮爆，但他知講錯說話後又大講三級笑話掩飾，十分搞笑。
鄭少秋再擔大旗拍攝無綫新劇《潮爆大狀》，昨日《潮》劇一眾演員鄭少秋、向海嵐、揚明、唐寧和陳鍵鋒等在將軍澳電視廣播城試造型。
託女兒慰問肥姐
一身大律師服飾的秋官昂首闊步，非常神氣，他說：「我做戲咁耐，都係第一次做大狀，我已經睇咗個劇本，劇情都唔係好潮爆啫。」秋官語畢又連忙解釋不是這個意思，並大講三級笑話轉移視線，秋官說：「因為呢個劇，我同監製去檢查過『高院』，大家唔好誤會，係高等法院，唔係嗰個睪丸。」
對於前妻沈殿霞的母親病重，秋官說：「之前同個女（欣宜）聯絡過，我託個女問候佢（肥姐），我冇打電話畀佢，費事佢心亂。」至於會不會探望前岳母，秋官說：「唔係幾好，點行開，要拍劇。」當年秋官跟肥姐離婚，不知他曾否被前外母鬧呢？他說：「點會鬧我，就算有，我都冇聽到。」
揚明知衰要檢點
另外，揚明日前被本報拍到跟一名女子在酒吧外擁吻，他對此說：「啲朋友叫我檢點啲，唔好咁鬼仔，不過我估唔到會影我。」問揚明做藝人是否較易識女仔，他說：「𠵱家啲女仔唔係咁，做娛樂圈唔係大晒，有啲女仔知你係藝人更加唔會行埋嚟，時勢唔同。」
採訪：楊潔雯 攝影：何榮亮
