港股持續飄忽走勢，承接美股造好，恒指早段升近14600水平遇阻力，退至14520喘定，其後再向上衝遇阻後，淡友即重施故技，大力將恒指掟低至14450水平，但跟住又好快反彈，恒指最後收報14541，升55點，成交僅160.37億元。
市場噚日傳出有歐資大舉入市接貨，後市唔可以睇得太淡，不過阿虎就唔知堅定流。
油價回升，中石油（857）升0.84%至5.95元，中海油（883）升1%至4.925元，但以中石化（386）升得最誇張，達3%，收報3.425元，成交3.87億元。市場主要炒兩個概念，一是炒成品油價格上調；二是炒中石化與英國石油（BP）有涉資140億美元的大型合作計劃。
中石油旗下的吉化（368）預期首3季虧損1.5億元人民幣，股價曾跌3.33%至2.175元，收報2.25元，冇起跌，市場似乎一早預咗吉化業績差。黑客話，若吉化業績太差，或者會增加中石油將其私有化的機會。
建設銀行（939）招股，市傳孖展認購反應並唔熱烈。Cookie話，這是反映孖展客學精咗，因為此股認購踴躍，大額認購所分得的股份唔會太多，而息率又高，以孖展認購冇乜肉食。
交行勝在有滙控
有人問阿虎建行與交行（3328）點比較？阿虎買交行主要睇好佢會成為滙控（005）在中國的旗艦，管理質素會改善，而建行身份是四大國有商業銀行之一，背負唔少政治任務與包袱，相信大陸唔會輕易將建行控股權拱手讓人，反而交行控股權有機會賣畀滙控，作為改革試點，所以阿虎睇好交行前景。
阿虎