嘉里九龍灣企業廣場第五期，會有個超級購物商場MegaBox，有一百一十萬方呎，喺東九龍肯定稱王稱霸，場內有啲乜租戶，市場人士只知少少，例如真雪溜冰場咁，都係嘉里刊物披露至知。今日嘉里會向傳媒講多啲資料。
總樓面有一百六十幾萬呎嘅企業廣場第五期，○七年第二季落成，𠵱家搞定租務都差唔多嘞。
地鐵九龍灣德福廣場一二期共六十二萬呎，二百幾個商戶，一直獨佔東九龍零售市場，但自從新地觀塘apm商場落成，即時分薄客源，遲吓再多一個超級商場，又多一個勁敵，肯定鬥餐死。
聽講，嘉里有意用天橋連接九龍灣地鐵站，希望吸引多啲人。
東九龍商場爭客戰愈嚟愈激烈，大業主認真頭痛，但對消費者嚟講，梗係歡迎啦，起碼多個行街購物嘅地方，而且，商場大搞活動及優惠，第日着數可能多到攞唔切。