借住美股回升，港股上晝硬淨，中午收市前至下晝開市後20分鐘，恒指變化係負數，埋單進帳55點，但期指則只升16點，低水35點。個市暫時動力仍然不足。
建行（939）明日中午截止認購，必然大超額，凍結嘅錢下周三或之前退番畀申請人，股票下周四掛牌。建行掛牌之後，申請落空嘅錢流入市場，有助股市回升。其實，申請落空嘅錢未必會流入市場，但如果好多人咁諗，自己走入市場，個市都會彈番上去。
恒指C輪9138：未來幾日，個市如果軟軟哋，低位買定啲恒指C輪，對象係9138。
隻輪明年1月下旬夠鐘，輪價20.2仙，溢價3.9%，槓桿率20.6倍（有效11.8倍），引伸波幅20%。
隻輪對沖值57%，照數計，恒指每變動1%，輪價理論變動約12%（槓桿率20.6倍乘57%），另1個更直接嘅計法，就係直接參考有效槓桿率，即11.8%，同12%差不多。
恒指P輪9207：建行上市前，如果大市升得急，則恐怕又會有回吐。如果恒指真係忽然彈升一二百點，則做睇淡嗰便，買恒指P輪，主角係9207。條數大約係，恒指每升跌10%，9207則跌升10%。
章盛