蘭西收到料,話中原中半山有個新人,三個月內做到十一單交易,總值兩億四。 呢個高級客戶經理梁翠顏,十幾年前做過呢行,後尾去瑞士讀酒店課程,返港從事酒店業有關工作,舊年七月重返代理界,今年七月,加盟中記中半山。 另外,中記十月初發放特別慶功利是五百蚊畀後勤,董事局又通過,發放第三季花紅畀非營業部員工,約相等於半個月糧。今個月,中記營業額料逾兩億二,睇嚟後勤又有利是。