蔡慧敏早前在台灣被傳媒拍下與小雪丈夫陳迅元於酒店房內激吻摸胸的照片，昨曰她接受電台訪問再被問及此事時，哭了近三十分鐘，她更透露第一晚於酒店房睡覺時突然被人撫摸玉背。
早前小雪丈夫陳迅元被拍下於台灣酒店內與蔡慧敏偷情，他更邊吻邊摸女方。事後小雪指是蔡慧敏勾引其丈夫，蔡慧敏則自稱是受害者被陳迅元「抽水」。
蔡慧敏昨日於新城直播室接受訪問，未夠十分鐘已開始落淚；事後她接受記者訪問時更激動地哭起來，全程哭了近三十分鐘。
第一晚遭摸玉背
蔡慧敏更將台灣三日的行程詳細說出來，她說：「第一晚我同陳生食完火鍋，四點幾就返咗酒店，佢就自己返咗自己房checke-mail，我就喺自己房瞓，我嗰晚係有着衫瞓，點之瞓瞓吓突然有人摸我背脊。」
當記者問她為何陳迅元有其房間鎖匙時，蔡慧敏卻未有解釋，她指當時叫對方停手。經過第一晚的「偷襲」之後，蔡慧敏第二天避見對方，她續說：「我梗俾佢嚇親啦，第二日佢走落嚟三次拍我門，每次都拍十幾分鐘，由於酒店係井字形設計，我相信樓上嘅人會見到佢拍門。」
及至第三日，蔡慧敏表示自己要為雜誌拍照所以穿了一件吊帶背心，在中午十二時左右她準備出門時，遇上陳迅元拍門，她便即時穿上浴袍才開門見對方，她說：「陳生有同我講十二點半約咗人，隔咗一陣佢先摸我條腰錫我一啖，嗰一刻我以為佢就走，所以同我goodbyekiss，點知佢就繼續向上摸，我叫佢唔好搞我。」
追究雜誌及酒店
蔡慧敏透露雜誌出版後，陳迅元曾致電問她為何會被人拍下照片，之後二人便沒有再聯絡，她暗寸對方：「我搵都搵個靚仔啲有錢啲，總之人哋屋企經濟上嘅嘢我唔想講，事前佢都有同我講過同小雪有問題。」
問到會否覺得對方是偽君子，蔡慧敏表示：「我唔知，大家識咗咁多年佢抽我水。」蔡慧敏更單打小雪說：「佢都原諒咗自己老公啦，將所有嘢推落我身上、將啲嘢掉轉嚟講。」最後她透露會對該雜誌及酒店採取法律行動。
「俾人抽十幾年水？」
對於蔡慧敏公開哭訴，小雪昨日在電話中說：「佢半夜俾人摸？有鬼呀？總之我有證有據支持我老公，我同我先生嘅感情重穩定過以前，佢會更加珍惜我同屋企。」
蔡慧敏指小雪將事件的責任推到她身上，小雪沒好氣地說：「嘩，佢做咗呢行咁耐，唔使介意人哋點睇呀？驚人誤會咪唔好着到咁性感，冇人影咪轉行囉。佢話識我先生咁多年都抽水，人哋抽佢水唔識報警㗎咩？點解重要俾人抽十幾年呀？」談到蔡慧敏接受訪問時全程露底，小雪即寸對方道：「佢可以着得斯文啲、條裙長啲，但唔係嘅話，邊個影你吖？」
採訪、攝影：駱華齡、朱倬誼
