大陸零售股似乎仍然係芬佬呢期嘅焦點。經紀黃上周六提到嘅新宇亨得利（3389），昨日大升8.88％，收1.84元，成交股數4122萬股，金額7403萬元。單睇成交就知唔係乾炒牛河咁簡單。
經紀黃話，除咗新簇簇嘅股份容易炒外，賣體育用品嘅李寧（2331）亦可以一諗，皆因隻股向來多芬佬睇好，而且又食正大陸消費股呢條水。
經紀黃又話，李寧雖然係大陸牌子，名聲唔夠外國牌子咁響，但喺大陸同胞心目中，則係實而不華。有分析員話，李寧喺大陸的零售點，計落有成3000間咁多，銷售網絡較同行的外國牌子大得多，而且公司相當進取，諗住每年開多500至600間店鋪，目標係2008年開夠5000間。李寧昨日微升1.62％，收4.70元。
另外，最近有位小兄弟問小初，點解奧瑪仕（959）計劃增持希臘神話賭場股權，停牌已經有個半月，但仍然未復牌？小初亦唔係太清楚，而江湖傳聞監管機構好多嘢要問，增持計劃可能有變。
慕容小初