已經成八十幾歲嘅周潤發媽咪陳麗芳，噚日喺佢中環住所附近幫亞視錄影喺今個月尾播放嘅特備節目《偶像媽咪大賽》，發媽喺節目中接受陳啟泰訪問，分享佢同發哥嘅母子情，同埋湊大仔女嘅辛酸史。
發媽講起當年捱窮嘅日子，點樣湊大幾個細路，忍唔住喊咗出嚟，佢話當年好擔心仔女養唔大，又怕發哥受唔起周潤發呢個名，所以用「細狗」嚟稱呼發哥，發媽喊住話：「唔好話叫佢做細狗，就連狗都不如，佢哋細個都冇人哋咁多玩具玩，淨係得石頭玩。」
請教練學游水
發媽話雖然佢哋家境清貧，但係發哥由細到大都好孝順，發哥喺十歲就幫媽咪賣茶果，雖然發哥𠵱家工作忙，但係仍然咁孝順，發媽又話，喺佢自己七十幾歲嘅時候，發哥為咗佢健康着想，每朝早都揸車載佢去學游水，發媽話：「我一世人都未學過游水，佢就畀錢請教練，朝朝早揸架車載我，迫我去學游水。」
