自從Sunday（866）同埋華潤萬眾（331）被併購後，其他流動電訊公司亦以同樣概念炒作，其中數碼通（315）、新移動（862）及城市電訊（1137）股價均見異動。
經紀陳話，本地流動電訊市場競爭劇烈，出現收購合併在所難免，而新移動炒得最勁，因為佢嘅傳聞最多，除咗傳出會被收購外，更有人話佢去收購其他同行至真，甚至有一種講法，唔係邊個食邊個，而係大家一齊成立合營公司，變相搞合併。
姑勿論邊一個版本至係堅料，總之有傳聞就有得炒，自然有人出嚟興風作浪。新移動呢隻股易手多次，併完股之後又發過新股，家陣街貨有幾多，實在好易數得出。不過，由於呢排市況麻麻，江湖傳聞炒家未能借消息出貨，所以隨時又會趁機會炒過。
新移動上周五最高升至3.20元，高位有回吐，收2.85元，僅升2.7%，成交股數477萬股，金額1420萬元。
慕容小初