九倉電訊登記客戶資料時，擅將客戶英文名字簡寫，三度接獲投訴都不立即更正，致客戶轉線另一電訊商要花兩個月；客戶質疑九倉電訊藉此拖延轉線申請，多收兩個月費用，向《蘋果》投訴，直斥九倉電訊服務差劣。
旺角彌敦道荷李活商業中心一電腦公司負責人陳小姐向本報投訴稱，其公司原本使用九倉電訊商業電話網絡，月費一千二百元，合約為期一年，今年七月中屆滿，因另一電訊商電訊盈科收費較廉，故約滿後轉用電盈網絡，但轉線一事令她滿肚子氣。
多番提出更正未獲處理
「我向電盈交咗申請表，由電盈幫我哋向九倉電訊申請轉線，諗住一約滿，電話線可以即刻轉去電盈，點知七月中電盈通知我哋，話喺九倉電訊紀錄入面，我哋嘅公司名，同申請表上嘅唔同，所以九倉電訊唔肯轉線；我即刻問九倉電訊點解會咁，職員竟然話：喺佢哋嘅紀錄，我哋公司英文名入面『INDUSTRY』呢個字，係簡寫『IND』，名唔同所以唔可以轉線。」
「明明我哋申請使用九倉電訊商業電話網絡嗰時，合約上面好清楚寫明我哋公司名係『INDUSTRY』，其他商業登記證、公司印章都係用全寫，九倉電訊點可以將佢變咗簡寫？𠵱家轉唔到線，我即刻要求九倉電訊改正紀錄，我重將啲舊合約畀番佢哋睇，職員話可以改番。」
陳小姐稱，她於七月底再接到電盈通知，九倉電訊又一次以名字不符為由，拒絕轉線；她致電九倉電訊要求處理，職員再次表示沒有問題，可是到八月底，電盈又通知她，其轉線申請第三度因名字不符而被九倉電訊所拒。「我真係好嬲，成兩個月都轉唔到線，搞到我哋咁麻煩，重要畀多九倉電訊兩個月電話費，好唔抵。」
公司名字不符被拒轉線
電訊盈科發言人回覆本報查詢稱，電盈是根據客戶提供資料為其轉線，電盈分別於七月十四日、二十九日及八月二十五日，為客戶向九倉電訊提出轉線要求，但均獲覆因客戶名字不符而被拒，致一直未能為客戶轉線。
九倉電訊跟進投訴後回覆稱，九倉電訊在收到電訊盈科之轉線申請後，已即時為客戶辦理轉線手續，只因資料有出入，才令轉線程序受阻延，獲悉有關個案後，已即時積極跟進及主動翻查所有資料並更正，於本月四日轉線至其他固網商。
（○九三○○三四）
服務熱線
電話：29908288
傳真：23702192
電郵：[email protected]