黎姿、何超瓊及萬寶寶等前晚往中環IFC出席一皮具活動，獲贈共四萬多元手袋的黎姿將男人妙喻為手袋，表示揀男人及手袋一定要質地好、內在好，她最怕幫女人挽手袋的男人，並表示男士送禮如手袋給她都會接受，收禮後才再評估對方的人品質素。
黎姿、何超瓊及萬里孫女萬寶寶前晚在中環IFC，出席西班牙皮具品牌Loewe的手袋展覽及秋冬時裝展。黎姿穿上價值一萬六千多元的裙子、拿着價值一萬多元粉紅色手袋出現，其間大會再送她一個價值三萬多元的灰色手袋，加上酬勞可說是大豐收。
最憎男人挽手袋
問黎姿在無綫台慶拿獎開心，還是獲此豐厚酬勞開心？她說：「獎攞唔到錢嘅啫。」她並透露已為下月出席台慶的服裝費神，她說：「𠵱家同幾個牌子傾緊贊助，我希望着我最鍾意嘅粉紅色，同埋相士都話粉紅色最旺我。」
黎姿還指自己很捨得花錢買手袋，幾萬幾萬元買也臉不改容，她更將手袋妙喻男人，她說：「揀手袋同揀男人一樣，我最講究質地、內在，要長青嘅，靚仔唔啱我，冇內涵幾多身家都冇用，同埋男友要受得我嘅脾氣。」黎姿又指對大男人又愛又恨，她說：「我好鍾意好man嘅男人，幫女人挽手袋嘅男人就最憎。」
「啲禮送到去屋企」
接着黎姿表示曾有不少男士送禮如手袋給她，她說：「禮物就一定接受咗先，之後先再評估佢個人。」問她會否收了禮後不接受對方？她說：「都會㗎，有啲禮係送到去我屋企，想退都唔知退去邊。」黎姿表示現在沒有拍拖，但篤信緣份的她說：「個天要我結婚就一定有得結，緣份到可能有人㩒鐘送上門呢？」
何超瓊則大讚現場由三名來自西班牙母子表演的flamenco舞蹈精采，她說：「我都希望明年可以放個兩個禮拜嘅假期，去西班牙relax一下，當地嘅男人激情浪漫又靚仔，如果你哋去到俾男仔電，千祈唔好覺得自己好巴閉，因為佢哋電人係好平常嘅事。」
採訪：RitaLeung 攝影：EdwardChou
