民協喺立法會只得馮檢基一票，所以從來冇諗過有得入行會，人無所求，就變得輕鬆好多。八方早前寫過阿基因為去英國考察扶貧工作，順道去探佢當年喺英國留學做兼職時接濟佢嘅餐館老闆娘，原來隻古仔重有下文，就係阿基搵到大恩人……但係就破咗財。
話說當日阿基終於去到一個小鎮搵到間餐館，不過，個老闆娘已經唔喺度坐鎮，換咗佢個女同女婿接手，阿基見到一位小妹妹，原來係老闆娘個外孫女。細問之下，先知老闆娘搬咗去約克郡居住，於是阿基逗留咗一陣，就開住架租番嚟嘅私家車去約克郡尋人。
搞咗成日，總算皇天不負有心人，佢喺晚上七點抵達，老朋友見面梗係份外好傾，食埋飯到成十一點先走，因為要同幾位議員滙合，阿基連夜揸車返倫敦，成兩點至到，佢本來想去酒店check-in，點知酒店話太早，叫佢六點半再返轉頭，於是阿基將架車揸咗去橫街停低，一覺瞓到天光七點先去住酒店，跟住還車。
罰咗八十一英鎊
阿基今次去英國算係大功告成，公私都顧及，佢滿以為好順利，點知前兩日竟然收到間英國車行來信，話佢喺倫敦非法泊車俾警察抄咗牌，一共要罰八十一鎊，即係港幣成千銀。阿基睇吓條數點計，原來倫敦市內有幾個區唔准喺早上七點後停車，橫街都唔得，呢樣罰五十鎊；重有二十五鎊係擠迫稅，六鎊手續費，夾埋八十一鎊，呢片倫敦牛肉乾都真係重皮。
阿基估唔到會喺英國被人罰錢，但冇法，人地證據確鑿，只好寄張支票過去。
傳真︰2623-9278
電郵︰[email protected]