昨日大行老友又約趙飛雲入馬場搏殺，居然人山人海。唔知係昨日因為跑婦女銀袋賽多靚女睇，定係因為近排港股大跌市，無嘢好炒，多咗人走去賭馬？近排港股大跌市，馬會生意的確好番啲。趙飛雲昨日收到馬房貼士賭第5場「天行者」及第7場「威利好好」，前者博輸，後者險勝，總算晚飯有着落。
晚飯時趙飛雲問大行老友對後市點睇？大行老友話，基金大戶9月尾推高港股季結後，10月馬上鬥快沽貨，質到股價咁上下低自然會買番轉頭，近年尾會重施故技推番高個市造年結。瑞銀話個市年尾會見萬七可能誇張啲，但要升破今年高位及見萬六，就一啲唔出奇，而和黃（013）及中移動（941）就好大機會成為升市火車頭。
趙飛雲聽完大行老友一席話，加上近期見到超人繼續出嚟增持長實（001），對後市多番啲信心。
上周五，美國公布的整體消費物價創25年最大升幅，但不計食品及能源項目的核心物價僅升0.1%，暫時紓緩了市場對加息的憂慮，美股出現不俗反彈，杜指升70點，收10287。杜指技術雖仍然偏弱，但在日線圖上，上周四出現十字星，周五出現陽燭，若是早晨之星，不排除短期調整或結束，先有二三百點反彈，上試20日線10400至50日線10500區域。
首個阻力14700
若美股本周回升，對過去兩周累跌近千點十分超賣的港股亦有利，有望先作技術反彈。
上周五在美國預託證券上市的本港兩隻最重磅大藍籌滙控（005）及中移動（941）均有不俗反彈，前者收122.75元，較香港收市121.80元高0.95元，後者亦較香港收市升0.35元。不過，港股短期反彈幅度未宜過份樂觀，現時100日線在14700水平，成為首個反彈阻力。
趙飛雲