久未露面嘅翁紅噚日出席澳門金至尊第一分店嘅開幕禮，佢當年選完亞姐之後嘅某珠寶代言人形象都好深入民心，但佢今次就係幫第二間公司宣傳。
咁耐冇見翁紅身形同個樣都keep得好好，重悉心打扮戴咗多款鑽飾到場。
獲贈鮮花笑逐顏開
日前馮仁昭喺中環機鐵站撞到翁紅同佢家姐，原來佢去接由美國返港、喺賭場任職高層嘅老公Gary，同行重有一個外籍友人，佢哋兩公婆一見面就雞啄唔斷，Gary重送上鮮花畀翁紅，又拖實佢離開機場，𠱁得翁紅笑逐顏開。
之後馮仁昭致電翁紅，佢話老公奉公司之命嚟拓展亞洲巿場，所以同埋公司嘅總廚一齊嚟香港搵美食，佢就負責做親善大使帶佢哋周圍食嘢。馮仁昭見佢同老公結咗婚兩年都咁恩愛，問佢有乜秘方，點知翁紅話：「做人老婆真係一門好高深嘅學問，兩公婆要互相遷就都唔係咁簡單嘅事，我𠵱家都揣摸緊，係學習階段。」
