如無意外，政改第五號報告書呢個星期三就會出爐，八方笑過肥龍醜婦要見家翁，個主流方案幾唔好睇，都要出台，要定唔要，由六十位尊貴議員決定。
民主派明知肥龍唔肯喺委任制上讓步，揚言下個月搞遊行。嗱，呢招就認真醒，因為特區政府乜都唔驚，最怕就係遊行。煲呔上到位都係要多謝五十萬港人上街，不過，佢梗唔想歷史重演。
八方最近去一個研討會，聽中大教授陳韜文同城大助理教授李立峰就三次7.1大遊行嘅分析，結果好有參考價值。調查所得，三次嘅遊行人士有典型共同特徵，主要係男性、大專程度、年輕、半專業或者專業、中產等。
陳韜文認為呢班人係香港根基，當權者不容忽視，佢哋一旦採取集體行動就別具份量，皆因佢哋上街都好理性、和平同埋自我約束。至於大陸成日以為係傳媒同名嘴鼓動，調查就發現呢個假設並唔成立，傳媒頂多係公眾意見嘅促進者，冇能力叫人上街。
煲呔今次真係要賭一鋪，事關好多調查話香港人唔重視民主，但係呢班上街中產就好成熟，重準備好邁向更民主嘅社會。
傳真︰2623-9278
電郵︰[email protected]