越嚟越鍾意食生蠔，清清淡淡，無油無鹽無調味，完全食大自然鮮味，無添加，lessismore，蠔真係一種有趣嘅生物，唔同地方出產嘅生蠔，吸收咗唔同地方海水嘅精華，以肉身過濾，生長出不同嘅滋味同肉質。
坐在生蠔吧前，眼前是十幾款不同產地嘅生蠔，大小形狀各異，價錢亦大有分別，由於該餐飯有有錢佬付鈔，於是可以放心逐樣試，但原來食生蠔大有學問，要由味淡啖至味濃，若然一嚟食咗隻味濃嘅，就番唔番轉頭食味淡嘅。蠔吧的專家為我們介紹，佢話記產地冇乜意思，不如記形容詞，「Plump」係指好飽滿嘅，食落口一口都係蠔，好滿足。「MildSweet」一入口已嚐到鮮甜，但味道偏淡。「Crisp」係指脆口嗰啲。「Cucumbery」唔止脆，重要加爽，唔係講笑，咬落真係嗦嗦聲。「Creamy」顧名思義，入口較漿，食幾隻就有飽肚感。「Salty」與「SaltyFreshness」有不同，同樣偏鹹，但鹹勁不同，就像澳洲與法國的海水有不同鹹的程度，出產的蠔便有不同的鹹味。有一些蠔被形容為「Fruity」，入口有股清新的味道，重要越嚼越有，適宜閉目享用，有一些蠔很有AfterTaste，吃完後喝口餐酒，口腔內仍留有一陣鮮味的餘勁，肉身已下肚，仍嗒得出靈魂的芬芳。
食新鮮嘅靚蠔，最好乜檸檬茄汁都唔好落，連殼上的少許海水與蠔肉同時噬之，滋味無窮。如果吃的是自助餐供應的半冷熱曖昧生蠔，檸檬茄汁老虎都要落，有咁多落咁多。