古天樂三年前以二千八百萬元購入京士柏山十六號一幢獨立屋，近日他成功以四千七百萬元將該屋出售，狂賺一千九百萬元。下周五三十五歲生日的古仔，笑言賣樓正是最好的生日禮物，更大讚自己投資眼光不俗。
香港豪宅市場這兩年持續熾熱，不少明星趁機換樓，古天樂在京士柏山擁有兩幢豪宅，其中三年前購入的京士柏山十六號近日成功出售，狂賺一千九百萬元。古天樂售出的豪宅，是他在○二年初以二千八百萬元購入，供父母及弟弟居住，面積約三千四百平方呎。
嫌地方細
六千萬買四千呎新居
其實十六號屋正是古天樂入行後所買的第一間豪宅，他與家人都十分喜歡該處的居住環境，但住了兩年後古仔有感地方不敷應用，上年十月他再擲六千六百萬元買入京士栢山另一幢四千二百呎的花園獨立屋，呎價一萬六千元。
其後古仔便開價四千六百萬元將舊居十六號放盤，至今已超過半年。昨日有消息傳出，指古天樂的十六號洋房已經售出，售價比他放售的四千六百萬還高出一百萬元，成功以四千七百萬售出，古仔買入該屋三年多即狂賺一千九百萬，認真和味。
樓價高企
「我睇好後市」
昨日記者就賣屋一事致電古天樂，他在電話中承認十六號屋已賣出，問他賺了這麼多錢打算如何運用？古仔說：「我會將賺返嚟嘅錢擺喺間新屋度，還多啲按揭，每個月可以供少啲，其實我當初都唔係諗住炒樓，只係因為好鍾意呢度嘅居住環境，先至會用成六千幾萬買間大啲嘅屋啫。」
古仔兩個月前已遷入新居，現時樓價高企，問古仔可有打算連新居一併出售再多賺一筆時，他表示睇好後巿，所以暫時不打算放盤。古仔說：「我𠵱家同屋企人都住喺新屋度，暫時未考慮過賣樓，而且我都幾睇好之後嘅樓巿，所以唔心急放樓。而且新居係我同設計師一齊構思設計，用咗好多心思，都唔捨得放。」
玻璃浴室
新居躺浴缸欣賞星星
古仔續說：「新屋最特別係浴室全部用玻璃造，瞓喺浴缸可以睇到星星月亮，早排我見天台屋嘅油漆同間屋唔係好襯，重自己落手落腳重新髹過啲油，𠵱家天台屋擺咗好多公仔，有我鍾意嘅萬能俠同蜘蛛俠，有啲重係一比一好似人咁高嘅，我𠵱家有時間都留喺屋企，唔多使出街。」
下周五是古天樂的三十五歲生日，但他當天要到內地參觀百事汽水廠，遲些才會返港相約朋友補祝生日。
古仔又笑言賣出京士柏山十六號屋對他來說已是一份最好的生日禮物，他說：「其實我當初買樓根本冇諗過有咁大獲利，今次賣樓，我覺得我嘅投資眼光都唔錯。」
採訪：陳月媚
