爆機狂迷：100個小遊戲20人對戰《BB從何處來？》棘手情敵出現

睇到呢隻《BB從何處來？》嘅剪影風格，心水清嘅玩家都知道係NDS上年底熱賣作品《為你而死》嘅續集作品，作為一隻以MiniGame為主嘅遊戲，能夠喺短短唔夠一年時間推出續集，大家可以想像究竟呢隻Game有幾受歡迎，想體驗吓隻Game有幾好玩，重唔快手買番隻？

記者：梁瑋瑜

售價：$260
機種：NDS
種類：趣味

DreamStore（25753285）
地址：灣仔東方188商場2樓256號舖

喺NDS眾多遊戲裏面，任天堂自家生產嘅Game無論喺日本定香港一直都好受歡迎，不過其他廠商開發嘅遊戲，只要識得充份利用NDS嘅特點，一樣可以設計到好Game，好似SEGA出品嘅《為你而死》同《BB從何處來？》咁，所有遊戲都要用到TouchScreen同內置咪嚟玩，難怪𠱁得NDS玩家咁歡喜！

■四格漫畫Feel，冇字幕一樣明。

新增第三者角色

今次嘅《BB從何處來？》同上集一樣，都係以追女仔為遊戲目標，不過今次呢個靚女唔單止你睇中，另外重有11個對手都同時睇中佢，打敗咗呢11個對手之後，最棘手嘅事先至出現，就係一個暗戀男主角嘅變態女仔，成日阻住男主角追女仔，玩家一時又要諗計脫離佢魔掌，一時又要努力追女主角，比起上一集《為你而死》簡簡單單咁追女仔，增加咗好多趣味同埋難度！玩家每次勝出咗小遊戲，就會逐關累積女主角對你嘅好感分數，記者玩過覺得小遊戲比起上一集有趣咗好多，每個Game都好有創意，而且總共有成100個遊戲，真係有排玩！

■追女搞到變俾鯊魚追，真係幾變態！

■要避開鯊魚，反應慢少少都唔得。

生BB環節情侶最啱

除咗小遊戲之外，《BB從何處來？》重加入咗好多新元素，首先有一個好啱情侶玩嘅「生BB」環節，兩個人分別利用NDS左邊嘅十字掣同右邊嘅按鈕，輸入出生日期、年齡及血型之後，就可以夾手夾腳切結婚蛋糕，喺蛋糕裏面就會見到兩個人生出嚟嘅BB，重可以幫佢改名㖭㗎！
如果大家重記得，《為你而死》日版係有日文同英文字幕選擇，不過去到《BB》，就只得日文，雖然係咁，記者覺得啲小遊戲都好容易就諗到點玩，而且劇情只係以圖畫交代，就算冇英文，其實問題都唔大。

■愛上女主角，絕對係一見鍾情。

■呢一關要將部NDS180度反轉先玩到。

■某啲關要打橫部機玩。

■唔同人生嘅BB有唔同樣貌同性格。

■最多可以有3個玩家File，有簽名代表，正！

最多20人通訊對戰

《BB從何處來？》繼續保留上一集有嘅換衫系統，只要玩家儲夠指定好感度，就會得到新嘅衣衫，此外今次玩家重可以親自為女主角嘅衫填色。另外今集亦新加入咗上一集冇嘅通信對戰，一餅帶最多可作4人連線對戰，如果玩家各自有Game在手，最多重可以20人連線對戰打MiniGame，認真犀利；此外，佢重可以好以《任天狗》咁，同其他玩家交換衣衫、髮型咁，令到一個原本係孤獨嘅遊戲可以同更多人分享。如果大家重想玩番第一集《為你而死》嘅話，最近呢隻遊戲重出咗一個為咗慶祝續集誕生而出嘅HappyPrice版本，內容冇變但售價只係$140左右，有興趣記住買埋喇！

■畫件迷彩比堅尼，完全自創。

■就算得一餅帶都可以四個人齊齊玩。

■重有一個要將部NDS互傳嘅小遊戲，得啖笑。

HappyPrice版《為你而死》
■基本內容完全一樣，不過價錢重平過二手。

想試玩？

可以上網度玩體驗版。
http://akadoko.sega.jp