新界王即係新界王，屯門天后古廟成個廣場噚日好似開演唱會咁熱鬧。原來噚日係鄉議局主席劉皇發六十九歲牛一，天后古廟筵開五百三十席，不過主題唔係慶祝佢老人家生日，而係祝賀發叔榮獲大紫荊勳章。歡宴大會有成幾千人出席，除咗地方鄉紳同十八區區議會代表，眾人媽打李麗娟都着到紅噹噹咁嚟到慶賀。
潮流興吟詩，繼煲呔整咗句王安石之後，發叔亦詩興大發，喺佢致謝辭時，先後引述咗蘇軾同諸葛亮嘅作品，作為心情寫照，又用咗《西遊記》嘅「寧戀本鄉一捻土，莫愛他鄉萬両金。」佢話甚麼金紫荊、大紫荊，其實係雪泥鴻爪，佢從未着意喎。千人盆菜宴好熱鬧，載歌載舞咁，發叔就當然成日都四萬咁口啦。
傳真︰2623-9278
電郵︰[email protected]
