星期五下午三點半，八位新行政會議成員面對記者，回答問題，一位記者問李國寶，第一句竟然係恭喜佢加人工，李國寶冇接受恭喜，當然啦，以佢嘅家世、地位及東亞銀行主席身份，點會計較立法會、行政會議嘅薪津呀，李爵士直情係貼錢為公眾服務，東亞銀行內有幾位叻人專係為李爵士處理公眾事務嘅，如果講人工，政府畀李爵士嘅津貼，點都唔夠用。
俗語話富無三代，李家就打破呢個迷思，翻查秦家聰嗰本李氏皇朝（TheLiDynasty），第二六八至二六九頁有李氏家譜。追溯上家譜第一代李家成（1808-1868），第二代李石朋（李家成三子，1863-1916）開枝散葉，生下六子一女，長子李冠春（1887-1966），就係李國寶嘅阿爺。李冠春生下二女四子，包括李福樹、李福善、李福慶、李福兆。
第四代李福樹（1912-1985）做過行政、立法兩局議員，生有兩子兩女，兩子就係李國寶（1939-）、李國章（1945-）。計落嚟，李國寶、李國章係第五代（由李家成算起），成就與父親不遑多讓，甚或過之，因為李國寶𠵱家追上父親成為行政、立法兩會議員兼且受英廷封爵，爵士呢個榮銜，係佢父親及祖父都冇嘅。李家第五代除咗李國寶李國章之外，重有終審庭首席法官李國能（1948-），馬會董事李國棟醫生及投資銀行家李國星，知名度甚高。
李家威風，由第二代李石朋開始大放光芒，傳至李國寶，已有一百四十年，歷史之久，相信整個中國（包括台灣），無出其右，如果讀者知道有另外一個中國世家論歷史、論功名、論財富，巴閉過香港李國寶家族嘅，請通知一聲。
李國寶李國章兩兄弟共有四子，是為第六代，自小享受富貴榮華，不過講番家族顯赫歷史，第六代嘅擔子不可謂不重。