遠東發展（035）過去7個交易日，全部陰燭兼陰乾回落，短線技術性見底，先嚟轉短打。遠展呢期調整，港股倒水不在話下，相信唔多唔少，市場正係等緊佢同威尼斯人馬交酒店大計協議落實，beforethat，睇數據最實際。遠展呢期有上海加州花園項目發力，又若然順風順水，花旗國曼克頓上城區項目應該可以入帳，06年度（3月止）純利增長，保守計，翻半番到6億銀，PE繼續維持6倍低水位。再講，隨住上海物業及花旗國項目回籠，遠展手頭現金應該去到17、18億銀，已經同16.9億銀貸睇齊，睇數據，冇問題。又雖則呢期兩家遠展嘅基金捧場客持股量潛咗水（5%樓下），但咪忘記，上年尾遠展發行咗批CB，總值7.54億銀，每股兌換價講緊係4.1元。呢轉遠展跌足7日，股價跌近一年支持位2.5元，RSI超賣，有條件嚟轉反彈，博成半升幅，啱啱上番密集區邊位3.1元。
中鋁有名牌睇好
中鋁（2600）年頭以嚟，大致喺4至5蚊上落，等緊破位，又講兩點：第一，上星期四，中鋁公布將氧化鋁價上調7.6%到4660元人仔。中鋁上年第4季狂加價後，好耐無上調價格，最新呢期加價，可能係季度性因素，亦可能係轉向訊號，總之繼續有noise，中鋁唔慌靜得去邊。第二，名牌除咗高盛外，呢勻亦見大摩加入，高盛俾中鋁目標價評級6銀嘢，大摩就建議增持。技術位睇，中鋁今年9月輕輕突破一年阻力軌後，又縮一縮，呢轉若然抽穿5蚊，參考高盛目標價，潛在回報率兩成過外。
錢雋