武術唔單止係一項運動咁簡單，喺電影界，佢嘅影響力更足以令李小龍、成龍變為全球公認嘅荷李活SuperStar！之但係，大家對幕後功臣又認識幾多？喺1999年及2000年，由袁和平擔任武指嘅《22世紀殺人網絡》及《臥虎藏龍》，分別奪得奧斯卡多個獎項，令日後嘅荷李活電影注入唔少「港產片」動作元素！呢套經過數碼修復嘅「袁和平×甄子丹動作系列」DVD，結合咗中西式武術精髓，並由動作演員甄子丹親身演繹，精采嘅功夫加上數碼音效，值得收藏回味！
記者：陳國輝
Profile
發行：星空
導演：袁和平
主演：甄子丹、于榮光、楊麗青
片長：89分鐘《鐵》/94分鐘《直》
級別：II《鐵》/IIB《直》
呢套DVD收錄咗兩套電影作品，分別係《少年黃飛鴻之鐵馬騮》以及《皇家師姐IV之直擊証人》。《鐵》於93年上畫，背景講述清末亂世時期，喜於劫富濟貧嘅鐵馬騮（于榮光飾），剛巧遇上性情剛直嘅黃麒英（甄子丹飾），後來二人成為好友，並合力對付假知縣；《直》於89年上畫，講述皇家師姐（楊麗青飾）因查探一宗毒品交易案而認識美國刑警甄子丹，後來兩人與黑幫爆發了一連串惡鬥。
必睇經典打鬥場面
睇過加入荷李活電腦特技嘅《22世紀殺人網絡》，嗰種超乎現實嘅武功，觀眾故然拍爛手掌！但如果再睇番純天然、未經加工嘅武打場面，效果又係點呢？即刻睇吓！
《少年黃飛鴻之鐵馬騮》
無敵鐵骨遮 精采程度：★★★★
黃麒英初到貴境，人身路不熟，就遇到一班專門蝦蝦霸霸嘅小嘍囉。雖然，佢並冇使出黃家獨門嘅無影腳，但只需靠一把鐵骨遮，已經將小嘍囉打到落花流水，輕而易舉。
決戰木樁陣 精采程度：★★★★★
最後決戰，終於到鐵黃二人合力對付衍空和尚！至精采之處，就係必需站立於木樁上打鬥，如果任何一方跌落火坑，均必死無疑。呢一幕除咗有得睇三人真功夫，場面亦好震撼！
《皇家師姐IV之直擊証人》
自製雙節棍 精采程度：★★★★★
論搶眼，女角嘅楊麗青都一樣勁！劇情一開始，佢就大玩古式詼諧武術，將兩支士巴那連埋一齊，就變成一件殺傷力極強嘅「雙節棍」，只消一擊就可以打暈敵人，厲害！
現代無影腳 精采程度：★★★★
嘩！乜連現代版佛山無影腳都出埋？
冇錯！呢套片入面，甄子丹唔止識中國功夫，重玩埋西洋拳，包括左勾拳、右勾拳統統出齊，而且重狂玩踢腿，連續十幾廿腳唔停咁踢，將武術中西合璧！
畫質OK 聲效震撼
老實講，就算套DVD經過數碼收復，但畫質始終唔及𠵱家嘅新片DVD咁靚，所以要有心理準備。不過，當你測試過聲樂效果後，經重新修復嘅數碼音效，表現又會點呢？答案就係：「好震撼」。特別係《鐵》片裏面，出現過好多特技場面，如使用飛鏢時嘅撞擊、大力金剛掌嘅破牆、塌屋等，全部如呈現眼前般，聲效非常逼真；相比之下，配音方面就略嫌遜色，最爆笑係幾乎每一句廣東話都咬字唔正。究竟係刻意安排，抑或想保留當年電影嘅原汁原味呢？
收錄甄子丹專訪
進入Bonus畫面，內容包括好「行」嘅劇照以及預告片（𠵱家嚟講已經好舊！），《鐵》DVD裏面附加咗袁和平嘅介紹，由家庭狀況、以至曾參與過嘅本港及荷李活作品都一一羅列，資料都幾豐富。不過，純文字好似睇電子書咁，就似乎有啲悶！至於《直》片Bonus裏面，就加插咗十幾分鐘嘅甄子丹專訪片段，由佢親自講述對武術電影嘅睇法，以及分享拍攝時所經歷嘅每種辛酸、得着，對於甄迷以及功夫片Fans嚟講，都好值得一睇。
DVDPro（23326326）
地址：旺角奶路臣街6E德發商場地庫B4
