外界經常將滬港兩地比較，又話上海會趕過香港，其實兩地有好多合作空間，中銀香港最近就好有創意，聯同中銀上海分行、上海市精神文明建設委員會，搞咗個以「美好明天」為題嘅滬港兒童繪畫及填色比賽，噚日喺中銀香港舉行頒獎禮。
主辦單位同八方講，𠵱家啲家長真係好重視發展小朋友藝術才能，呢次比賽，兩地各有超過一萬幅作品參賽，得獎作品中，重有最近熱爆全城嘅「神舟六號」畫作㖭。
一班得獎上海小朋友，連埋家長同工作人員約四十人，更獲安排嚟港出席儀式；而本港各組別獲冠軍嘅小朋友亦唔輸蝕，獲贈港滬來回機票連四日三夜酒店套票，一家三口成行，中銀香港呢次認真大手筆。
傳真︰2623-9278
電郵︰[email protected]