特首曾蔭權噚日同逾千個青少年真情對話，其間大爆閨房秘密，有學生問佢為人嚴肅古板，當年點樣求婚呢？煲呔話，十四、五歲時已認識𠵱家嘅曾太鮑笑薇，廿四歲時，細佬蔭培結咗婚，佢又膽粗粗「求婚」，但唔係跪低送花咁浪漫，只係一句「不如我哋結婚咯。」曾太一句「都好啦。」兩人就拉埋天窗，煲呔笑言「係好老土、呆板，但（兩夫妻）最緊要堅忍同有維持力。」
煲呔曾經呼籲港人多生仔，噚日有學生問佢會否以身作則，佢話太太已遠離生育年齡，所以生仔問題已經唔關佢事。由孤獨推銷員做到特首，曾蔭權話印象最深刻係八十年代初做沙田民政專員經歷。
生仔問題已唔關佢事
當年佢由哈佛大學進修歸來，已做咗十年AO（政務主任），卻被派去做地方官，於是走去同上司鍾逸傑「講數」，話如果唔升佢，就放佢一條生路，畀佢離開政府出去博多鋪；鍾Sir安撫佢畀心機做，煲呔就惟有叠埋心水返沙田，之後成立咗全港首隊少棒隊，又成功游說居民接受成立首間中途宿舍，做咗三年地方官，之後就連年升職。煲呔話，如果有得揀，最想做多次民政專員咁話。
煲呔喺施政報告中引用王安石詩句，噚日則以郭富城名曲《強》鼓勵後生仔，「雖跨多少個山，漫漫長路與海，方可真正覓到心裏精彩。雖經多少次哀，幾多的障礙賽，才勝利會換來。」佢話歌詞表達好大嘅真理，勉勵年輕人要自強不息，唔好學似阿叻咁唱，以為「玻璃可變鑽石」咁浮誇。
傳真︰2623-9278
電郵︰[email protected]