吳君如日前接受記者訪問，對於好友李嘉欣和有婦之夫龐維仁傳緋聞，她自言從未做過第三者，反而常被第三者介入，但她指戀人分開不能全怪第三者，因女人要自我檢討，想一想自己有「幾難頂」。猶幸君如與男友陳可辛甜蜜如昔，且努力造人，最終若仍未有所出，便會領養BB。
愛情篇：女人要自我檢討
吳君如和導演陳可辛拍拖八年仍未結婚，反而好友杜汶澤和田蕊妮今年拉埋天窗，君如表示一定會結婚，但就不想高調，最好連擺酒都免。
「唔驚傳媒寫散」
吳君如日前說：「阿澤同我性格唔同，再講我喺呢行日子咁耐，唔想結婚都好似做騷咁，而且我又怕煩，只希望同啲朋友食餐飯，或者旅行結婚，唔會刻意周圍講畀人聽，父母方面冇牙力亦冇壓力，我唔會好似普通女仔咁諗住結婚嗰日我就係女王，可能平日我喺同事、屋企人面前已經日日係女王，所以唔使專登揀一日嚟做。」
吳君如又表示不想多談陳可辛，怕予人晒命感覺，她說：「我嘅感情生活其實好平淡，平淡到唔知講乜好，而且成日提住男友，好似好冇性格，但我又明白傳媒一定會問，講到我哋好好，又有人憎人富貴，𠵱家啲人鍾意負面。我唔驚傳媒會寫到拆散我哋，一對情侶分開唔可以賴晒傳媒，係大家信任唔夠，本身已經有問題，有時又會避忌面子問題。男人去滾，隔籬嗰個通常係最後先知，大家都係做呢行，撞口撞面好難落台，寫咗咪散囉。」
「俾人飛先識keep」
吳君如的好友李嘉欣最近跟有婦之夫龐維仁傳緋聞，被指是破壞別人婚姻的第三者，君如對此說：「我同嘉欣雖然唔係成日見，但大家係老友，佢嘅嘢我就真係唔評論啦。」問君如有否做過第三者，她說：「我未試過做第三者，多數係第三者插入，成日都係咁嘅公式，但我覺得都唔可以怪晒第三者嘅，你有冇諗過自己幾難頂先，或者係一早有問題又唔理，當時人哋都出到聲話你肥啦，冇第三者咪相安無事囉，一有就知人哋真係正過你好多喎，俾人飛先識得keep，抵死㗎。」
君如每段感情都維持六、七年，她說：「每次俾人飛都好多謝佢，因畀機會我開始另一段感情。」
造人篇：五年時限生小孩
吳君如亦揚言一定會生小孩子，皆因她十分喜歡小朋友，如果無法生育，也會去領養，君如說：「長毛（陳可辛）唔係特別鍾意小朋友，我就真係好鍾意，但都要有能力生先得，你知我年紀都有番咁上吓啦，我覺得自己喺經濟上、愛心上都已經可以有小朋友，我會畀自己五年嘅時間，如果都生唔出咁就冇計，我諗到時我會去領養，不過唔會領養外國人，中國人都係幫番中國人好啲。」
