呢期自由黨風雨飄搖，班跟紅頂白嘅俊傑，當然明白「一水護田」只係巧合，「一致倒田」至係真，於是明寸嘅唔少，暗踩者就更多。八方聽聞，自由黨主席田北俊近日冇覺好瞓，重出入養和，不過唔使擔心?開心，佢不單止冇事，重不知幾咁高興！
事緣田少最近人逢喜事，都費事同煲呔爭一日長短。乜嘢喜事？咪榮升外公囉。原來田少個乖女Andrea田啟安上星期三朝早喺養和醫院誕下麟兒，重六磅九安士。八方噚日恭喜田少，佢開心到不得了，重傳咗張喺醫院抱住BB嘅相畀八方睇，唔知有冇download埋落手機度？
「第一個孫當然好開心，我好耐冇抱過咁細個BB，好驚會跌咗佢落地。」田少一邊講一邊笑到合唔埋口。八方聽聞，個BB出世後，田家上下都好興奮，大舅父Calvin田啟文成日攞住個外甥仔張相畀人睇，話佢好cute。
Calvin今年初先結婚，田少恨抱孫恨到出聲，有人問Calvin，幾時到佢太太生，佢就話遲啲先喎。遲啲唔緊要啦，反正個女生田少一樣咁開心，田太Mary就更加忙到不得了。田少話，個女同女婿Arthur鄭唔識湊初生BB，餵奶換片都搞到手忙腳亂，所以住咗六日養和醫院後，就搬咗去佢屋企，諗住住一個月，等外婆幫吓手。咁田少有成三個菲傭，當然易搞好多。
半夜餵奶似時光倒流
田少又話，個孫仔噚晚兩點幾醒咗喺度喊，搞到佢都醒埋，後來餵咗佢食奶就瞓番；呢對新外公外婆好似回復到好多年前嘅日子，BB一晚喊幾次，大家就冇覺好瞓。田少個孫英文名叫做Dominic，中文名就未改，田少話留番個女同女婿哋慢慢諗，因為個孫姓鄭，梗係唔由佢話事。
講番自由黨，早前周圍傳佢哋想爭取喺行會有多一席。煲呔噚日終於公布新行會成員名單，八個名都冇意外，亦冇自由黨人。煲呔話佢哋都係界內精英，又口口聲聲話唔做政治交易，所以冇再加政黨人士入會。係人都知佢喺度影射田少，而一入八個人，多過前朝嘅七個，擺到明係新舊有別，親疏分明。咁田少亦無謂爭，冇自由黨份咪算囉，反正夏佳理曾經係佢哋黨員，阿Q啲都算中咗半個獎，更何況有孫萬事足，諗吓煲薑醋好過諗煲呔啦。
傳真︰2623-9278
電郵︰[email protected]