見到《CODEAGECOMMANDERS》由SQUAREENIX推出，當然第一個印象都係RPG，估唔到係喺正統ARPG玩法外，更加入可隨意選擇任務，配合一貫招牌式華麗動作場面，畫面夠省鏡，而且對於要打得爽快嘅玩家，遊戲內出現一波又一波嘅敵人，可以打得非常痛快，加上可愛嘅OTELLO替玩家增加能力，絕對係近排最耐玩的遊戲之選。
記者：許福合
遊戲Profile
主機：PS2
開發：SQUAREENIX
類型：ARPG
人數：1人
價格：$398
《CODEAGECOMMANDERS》除咗牌頭就出現SQUAREENIX夠號召力外，製作班底背景亦好有份量，製作人直良有祐，就曾參與《FinalFantasyVI》、《VII》、《X》製作，所以畫面聲效都極似《FF》風格，對好多唔靚唔玩嘅「視覺系」玩家，《CODEAGECOMMANDERS》絕對不能錯過。
ARPG混合任務制
通常ARPG遊戲都有大量CG片段，《CODEAGECOMMANDERS》更係跟番《FF》嘅傳統，配有大量動畫，無論係開場定係遊戲中途，都有機會欣賞得到，而遊戲除咗有一個完善世界觀外，人物設計上更係落足心機，基本上玩家至少有機會控制4名角色，每名角色設計採用同一個風格嘅同時，又各自有本身嘅武技特色！
ARPG遊戲本身就有個局限，故事發展有一定方向，《CODEAGECOMMANDERS》將ARPG玩法與任務制結合，所以玩家並唔一定只係限制用主角，按故事發展，其他角色都有機會上場，由配角變主角，所以每個任務本身都會跟番開場動畫，除咗美觀外，亦有講解故事用途。遊戲設計都因應機迷需要，當進入戰鬥畫面，隨即會顯示任務過關條件同限制時間，餘下嘅就係考驗玩家實際技術。
吸OTELLO變絕招
操控上來講，《CODEAGECOMMANDERS》都算幾特別，玩家用得最多嘅掣必定係○同×，事關分別代表角色嘅右手同左手，出招時狂㩒之外，原來重會有另類用途，用以對付遊戲內嘅特別生物——OTELLO；呢隻外表好Q嘅生物究竟係企哪邊真係無人知，見到玩家就會作出攻擊，不過同時又係玩家嘅好幫手，只要持續咁按住○或×就可將OTELLO吸收，取得其中特殊能力，而OTELLO分別有3款，可加強攻擊力嘅攻擊型，能加快回血速度嘅回復型，亦有可詛咒敵人，降低其攻擊速度嘅類型，玩家戰鬥時，只要認清OTELLO款式，選擇性咁吸入左手或右手內，於戰鬥時就能利用到當中特性，筆者試過得到OTELLO嘅力量後，戰鬥力可能會提升幾倍！當打Boss時，OTELLO更會成為玩家撒手鐧，打到最後，可以將所有已吸入OTELLO當炮彈咁發射，威力亦相當驚人。
必殺「CodeDrive」
就咁狂打狂㩒雖然打得爽快，不過難免會較為單調，必殺技式連鎖招數「CodeDrive」當然係必備，甚至可將戰況逆轉，當發動「CodeDrive」後，就會進入特別畫面，玩家這時就必定要盡快按畫面輸入指令，按錯或失敗都會招致敵人猛烈攻擊！要提升實力，亦可使用CODEPOINT，每次完成任務，都會按表現得到一定POINT，可強化角色各種能力值，適當地按需要分配，角色戰鬥力可作大幅提升。
這個遊戲好玩處係難易度取得唔錯平衡，尤其並非一味靠狂打，打機亦要食腦，好似對付各大Boss，用腦打至為重要，好似一隻身在沼澤Boss，擁有一個超堅固外殼，一般攻擊真係當搔癢，不過只有趁佢打開外殼攻擊，傷害就會大得多，所以打Boss記得帶埋個腦去打！
(C)2005SQUAREENIXCO.,LTD.