建設銀行招股，除咗可以令港交所豬籠入水，亦令公益金受惠，因為自從○○年開始，新上市公司如果要揀一個幸運號碼做股份掛牌編號，就要科水，不過錢唔係入港交所嘅袋，而係捐晒畀公益金。
原來近排呢筆善款累積超過一億元，所以下星期一公益金特登搞咗個致謝儀式，重請到唐唐主持，重新加入行會嘅港交所主席李業廣當然會到。
根據港交所嘅抽冧巴制度，如果只係喺一堆好意頭數字中，抽一個，盛惠五十萬；但係如果想要一個指定靚號碼，就要畀一百萬。今次建行要咗個「九三九」，其實唔少內地公司老總都鍾意講意頭，所以只要第二時不斷有內地企業來港上市，公益金都唔使憂乾塘啦。
傳真︰2623-9278
電郵︰[email protected]