今日係鄉議局主席劉皇發嘅生日。發叔喺一九三六年出世，今日就正式踏入六十九歲嘅大喜日子。呢一年對於發叔嚟講，真係意義重大，事關佢獲頒特區最高榮譽嘅大紫荊勳章，呢啲榮譽真係非同凡響。為咗慶祝發叔為新界人增光，一班屯門區鄉紳今晚會喺屯門天后路天后廣場，擺下近五百圍盆菜宴，等大家開開心心食番餐。
據聞發叔都會喺今日咁特別嘅日子，有項重要宣布。內容係乜？如無意外，都係話自己唔會咁快退休，換言之，○七年換屆改選時，會繼續競逐連任。發叔一出，邊個敢挑戰？即係發叔下屆都會繼續率領鄉議局群雄啦。
重有，鄉議局原本定咗十一月十九號，喺元朗大球場設千席盆菜宴賀發叔㗎，但因為煲呔出差唔得閒，為咗遷就呢位貴賓，已決定改期至十二月十號先搞。
傳真︰2623-9278
電郵︰[email protected]