交易所實施新上市規則，要求董事具名披露酬金，重要清楚寫明攞幾多人工，唔係好似舊時咁，得個大概金額，所以今年要比較邊間企業對員工最闊綽，就易做好多。
噚日，信和系同恒隆系一齊出年報，一向敢言嘅恒隆老闆陳啟宗，對員工一啲都唔刻薄。最高薪嘅執行董事袁偉良，計埋薪津、花紅、退休金等，去年袋成一千二百四十萬元。八方記得之前寫過，新地最高人工嘅黃植榮，計埋所有薪津、袍金、花紅、退休金等總額一千二百二十九萬，都唔及袁偉良多，可見陳啟宗出手好闊綽。至於陳啟宗自己，就攞咗一千一百八十萬元。
至於喺賣地場上一擲千金嘅黃志祥，出糧就非常克制，成間信置，董事酬金總額都唔過一千五百萬。集團最高薪酬嘅員工係負責法律事務嘅執行董事唐國通，但都只係得四百零萬，至於黃志祥就重少，喺尖置攞一百二十九萬，除咗誠哥李嘉誠攞五千蚊人工，睇怕黃志祥都應該係薪酬最少嘅大地產商。
傳真︰2623-9278
電郵︰[email protected]