港股勢弱，淡友自然放肆，恒指上午兩度被質破14500，午後反彈未能重上14500，淡友出力踩多腳，將恒指壓至14439低位。近排淡友出手快而狠，眨眼間個市可以唔見五、六十點，而去完洗手間返嚟更可能唔見成百點。恒指最後收報14485，跌135點，成交達218.59億元。
超人喺9月用咗9億元增持長實（001），又喺10月7-12日期間再斥資1.6億元增持，每股介乎82.259元至83.436元。不過，長實噚日仍一度跌破80元大關，低見79.45元，收報80.45元，跌1.16%。中煤（003）近期亦頻頻在16元水平大手回購，噚日收報15.95元，冇升跌。不過，大藍籌回購的情況不算普遍，唔知係咪反映藍籌公司管理層認為現時仍未跌至好抵買嘅程度。
高盛力托雨潤富豪
建設銀行（939）首日招股，拆息並無抽高，有人話孖展認購反應冇預期咁理想。其實安排行預期會凍結資金2000億元，而銀行早有準備，只要認購額唔高於此數，拆息估計唔會大幅扯高。
上市冇幾耐嘅雨潤食品（1068），噚日一度跌破3.70元的招股價，低見3.675元，其後在保薦人高盛力托下，反彈回3.725元收市，冇升跌，成交5140萬元。隻股看來要沽嘅都沽得七七八八，收齊貨後，股價有機會再炒上，高盛過往做保薦人的成績有目共睹，雨潤可以睇好。
除咗雨潤外，阿虎亦見到高盛排晒隊為富豪（078）接貨，似乎有啲嘢喎。富豪逆市升1.72%至0.59元。
阿虎