星期三曾特首講施政報告，一路講，股市一路跌，佢開始之時，恒生指數升咗三四十點，到佢講完，股市開始大瀉，下午一開市，崩圍咯，成交同時大增，卒之全日跌咗三百二十三點，成交額達二百五十億元。三點半之後，左丁山打電話畀財經演員Ｓ，問佢為何股市大跌，是否市場怕咗曾特首？演員Ｓ話：「照計唔關特首事，份施政報告內容幾務實吖，講中央願意畀香港擴大人民幣業務，對銀行有利；講積極策劃沙田至中環線，西港島線，對基建有利，股市應該唔會跌得咁厲害，我認為係受外資沽貨所致，日本、南韓、台灣都大跌，好鬼一致，唔會無風起浪嘅。」
若與施政報告內容無關，就係曾特首唔好彩。問完演員Ｓ，改問建築Ｋ，對特首高度重視基建，有何想法。建築Ｋ話暫時遠水難救近火，佢自己間大寶號唔夠工程做，心裏焦急，只希望添馬艦、西九龍、地鐵港島西線等工程唔好得個講字，快啲上馬，帶旺建築業。
建築Ｋ間寫字樓在鰂魚涌，家住灣仔，佢話寫字樓租金越平越好，第日唔介意搬到去柴灣，橫掂乜嘢設計、落標都可以透過互聯網搞掂，點解要在貴區辦公交貴租？建築Ｋ注意到灣仔街頭，有地磚嘅，近日都俾政府人員用強力膠水黐實，用鈎拉得起嘅坑渠蓋亦然，做乜鬼呢？建築Ｋ問一位與警界熟悉嘅朋友，據講係為咗WTO開會，防範示威分子喎。建築Ｋ重以為係為咗保護街道完整，防止示威分子破壞街道。與警界熟悉嘅朋友話：「非也，一啲外國領事館通知，WTO示威分子絕對冇香港長毛抬棺材咁斯文，佢哋會隨時挖起行人道上人嘅地磚，擲向防暴警察，成條街都係示威分子嘅武器！」香港自一九六七年之後，未曾出現咁嘅場面，不過警方既收到外國領事館提醒，於是未雨綢繆，用強力膠水黐實啲地磚。外國有唔少巡迴示威分子，趁WTO嚟香港玩一鋪嘅話，包保香港人會話長毛夠晒斯文。