甫一踏進Erica的家，十多對眼睛上上下下地打量我們，主人還未來得及打招呼，數隻貓咪已跟我們來個見面禮，在我們的腳跟輕輕擦過。三年間能夠由兩隻貓變成一個十六口之家，Erica話從未想過會如此，要怪的就是貓咪們太過多情，最後連最基本的生活瑣事──如廁，也搞到好大陣仗，經常要排長龍。
記者：李敏怡 攝影：陳陶鈞
有客到訪
大佬要威威
喺呢間屋見貓重多過見人，人貓比例係2對16，邊個至係呢間屋嘅主人？真係唔多清楚。「佢係我哋呢間屋嘅一家之主。」Erica指着大頭B說。喺呢個大家族中，以大頭B最得主人歡心。無他，單睇佢咁有台型就令人貓肅然起敬。主人話大頭B已有三歲，性格變得沉實穩重，愛靜靜坐喺一旁，睇住啲𡃁。不過，可能佢真係以為自己係一家之主，見到記者來訪，立刻熱情起來，表演多項高難度動作，睇到其他貓咪眼定定。
男歡女愛由2到16
呢個世界有好多事情係好難控制，就好似愛情呢樣嘢，想擋都擋唔住。三年前，大頭B遇上妹頭，一見鍾情，重私訂終身。不過，喺今時今日，重點會有童話故事式嘅愛情故事發生？男方另結新歡，女方另有新男伴，男女關係錯綜複雜。結果，貓女們相繼大肚。「原本打算帶喳公貓去做閹割手術，但係行動太遲，東東、南南同北北，已經大咗肚，閹都閹唔切。」主人Erica說。雖然全屋貓公已經做咗閹割手術，但係呢三年間，貓的數量已經由2隻變成16隻。
貓口眾多 如廁排長龍
要養16隻貓，Erica話一袋80Kg貓糧，普通人家（即養一、兩隻貓）個多月先至要入貨，但Erica就每隔兩星期就要入貨畀呢班老細。而貓砂理論上一星期換一次，佢哋個貓廁所就要三日清理一次，而且由於貓口眾多，周不時都會出現排長龍等去廁所嘅情況。
一無所出搞到自閉
不過，唔係隻隻貓公都可以有咁嘅江湖地位，就好似細B咁，身為家族嘅一分子，卻無兒無女，多番嘗試都未能成功。Erica話可能因為咁，𠵱家細B嘅性格愈來愈孤僻。「佢係全家最惡，鍾意自閉，有人搞佢，即刻會破口大罵。」
孱女奀豬精靈搶鏡
之不過，Erica話服侍呢16隻老細，一啲都唔覺煩，因為各位都好獨立，識得照顧自己咁話，唯一要讓她操心，就係貓女臨盆嘅時候。Erica同貓女接生次數，大大話話都有5次，其中貓女奀豬最令佢操心。「奀豬出世時身體好弱，佢唔肯食奶，個樣好似人哋氣息奄奄咁，我哋原以為佢就快死。於是，我同佢講，奀豬，如果你覺得辛苦，咁就走啦。」Erica憶述當時悲傷的情景。怎料，一覺醒來，奀豬精神奕奕咁同Erica打招呼。現在，奀豬已有三個月大，雖然身形比同齡的家姐YY細小，但卻精靈活潑，重周不時搶鏡，成為16隻貓中最活躍的一名成員。
