噚日行會新貴出場，唔知班記者唔熟性，定係Marvin張建東呢位番書仔中文差，記者問佢同馬時亨局長嘅關係，又問係咪會做咗馬仔老細，真難明白，因為雖然煲呔唔使班局長次次去行會，但仍然係行會成員，冇乜高下之分。結果張建東答到亂晒龍，講到自己同馬仔係陌路人，重話「我喺港交所，佢已經唔喺度。」
此語一出，馬丁李隨即喺一個酒會向馬仔亨學是非，話張建東話佢已經唔喺度，點知馬仔重激，佢話自己當時喺部長樓睇直播，簡直想即時跑去政府總部新翼記者會現場，大聲講句：「我重健在」。
馬仔話，佢識Marvin好耐，當年佢喺熊谷組，Marvin係公司核數師，喺會計界早負盛名，佢哋的確係唔同時期喺港交所做公職，而Marvin五十五歲退休後，做上市委員會主席就係由馬仔亨出馬邀請嘅，你話又點會係陌路人呢？
傳真︰2623-9278
電郵︰[email protected]