組合Beyond呢一年嚟都喺東南亞地方舉行巡迴演唱會，今日佢哋三個就唱到新加坡，不過喺內地有單新聞傳咗出嚟，話Beyond今年七月二十二號喺鄭州開嘅《Beyond的故事2005鄭州演唱會》，當地嘅主辦單位涉嫌冇事先向有關部門申請，兼且未交「著作權使用費」，𠵱家俾中國音樂著作權協會追討三十萬元。
或遭起訴
據知，當晚Beyond嘅其中十幾首歌曲都係未交呢個費用，而且連二○○三年嘅深圳主辦商都有可能被起訴。馮仁昭就呢件事聯絡咗Beyond嘅巡迴騷負責人，佢話：「據我所知，呢啲類似係香港嘅版稅。係咪每次表演前要申請就唔知，但我哋喺內地表演係有個agent負責，佢哋再會喺每個地區搵多個主辦單位。我哋簽約嗰陣，呢啲係由agent負責。」
但據馮仁昭所知，「著作權使用費」係畀番啲版稅歌曲著作人，所以巡迴騷負責人又話：「其實好多歌Beyond都有份作，所以某程度上都係幫Beyond追討。」