煲呔曾本周三宣讀施政報告，恒指散323點，昨日宣布行會新任命，恒指又散135點，又會咁啱嘅？窩輪市場自然又係雞毛鴨血，跌幅25%以上嘅窩輪，大約有50隻。即將到期、槓桿率大嘅C輪，散得最淒涼。
國壽C輪3967：3967由2.5仙瀉到1仙，跌幅60%，有28球易手，買家玩死亡遊戲。隻輪下月1日最後買賣，得番11日交易，行使價6.20元。正股（2628）𠵱家5.70元，未來兩個禮拜升唔番0.50元以上，隻輪作廢，𠵱家重博隻輪者，已經打定輸數。
窩輪也者，高風險高回報嘅東西。3967今年3月面世，8月見過46仙，原始捧場客叫做賺過67%，但揸到𠵱家，同蝕晒冇乜分別。
長實C輪3893：3893最低25.5仙，收30.5仙，夠膽低位撈貨者執20%利潤，但前晚揸貨過夜者則輸26%。隻輪有35球易手，金額11球。3893本月25日最後買賣，剩番7日交易。行使價78元，正股（001）𠵱家80.45元，未來幾日如跌2.45元以上，隻輪冇得剩。正股如升2.45元，則隻輪值49仙，可升61%。個市動盪，長實幾日內升跌2元以上唔出奇，即係隻輪會繼續飛沙走石。
和黃C輪4897：4897下月7日夠鐘，下月1日最後買賣，重有12日交易，好多人短炒，有127球易手，金額38球。
隻輪行使價73.88元，正股（013）收75.55元，隻輪輕微價內。到期嗰陣，正股升到76.73元則打和。正股跌1.67元，揸輪輸晒。正股起1.67元，揸輪則賺17%。
章盛