外圍雖然冇事發生，但港股昨日仍然跌百幾點，小初真係百思不得其解。家陣惟寄望建設銀行（939）招股完成後，資金回流市場，大市會再現生機。
另外，前日經紀黃講到大陸消費股可吼，噚日佢又提到半新股，喺大陸賣表嘅新宇亨得利（3389），上市後股價一直企硬，起初小初見到中資證券行有買盤密密掃貨，重以為淨係大陸炒家喺度炒作，但自從聯交所公布Swatch買咗5％股權後，即刻為芬佬打咗口強心針，不斷見到有外資行頻頻掛入買盤，令隻股愈升愈有。
新宇亨得利昨日逆市升4.97％，收1.69元，又創上市以來新高，成交股數1332萬股，金額2199萬元。隻股以每股1.32元招股，集資約3.3億元，一個月唔夠，現價已較招股價上升28％。
至於招股逾百倍超購的永樂電器（503），昨日首日掛牌收2.375元，只係升咗5.56％。經紀黃話，隻股公開招股部份超額咁多，要由配售部份回撥，咁嘅表現其實屬正常。
慕容小初