蔡慧敏日前到台灣旅遊，卻被雜誌偷拍到與前歌手小雪的丈夫陳迅元在台灣酒店「偷食」。蔡慧敏前晚自稱被陳迅元飛擒大咬，但小雪昨日反擊蔡慧敏，表示老公送她鑽戒補鑊，並說：「好多女星搵老公着數。」
蔡慧敏近日被偷拍到與前歌手小雪的丈夫、永安旅遊榮譽主席陳若偉兒子陳迅元在台灣酒店「偷食」，陳迅元與小雪到台灣旅遊，竟安排蔡慧敏住同一酒店，樓上樓下方便密會。
「我係受害人」
有雜誌拍得蔡慧敏和陳迅元在酒店房間的親密舉動，穿上浴袍的她任陳迅元撫胸和啜嘴。蔡慧敏前晚在灣仔出席家庭電器活動時，就此事主動解畫，她解釋十多歲時已認識陳迅元，當日是陳迅元主動為她安排酒店，蔡慧敏說：「我冇錯，我只係受害人，全程係佢有問題，大家識咗咁耐，佢咁隊我，真係影響友情。嗰朝係佢嚟拍門，講啲無聊嘢，我着住浴袍，坐喺度，係佢撲埋嚟飛擒大咬。」
小雪：疑點太多
提到被陳迅元撫摸胸部，蔡慧敏即說：「我有推開佢㗎，我哋冇發生性行為。」但報道卻指房內有安全套，她說：「唔係我㗎，佢有冇帶嚟我就唔知。」蔡慧敏指自己並不認識陳迅元的太太小雪，她說：「佢（陳迅元）同我講話老婆有產前產後抑鬱症，脾氣好差，兩個人就快離婚㖭。」小雪接受訪問時則表示已原諒了老公，她解釋陳迅元當日被蔡慧敏勾引入房，她笑言老公謂要搞都搞個紅一點的女星如李嘉欣。
小雪昨日接受本報電話訪問時說：「話我抑鬱？我先生對我好好，結婚之後去過三次台灣、三次新加坡，我有問題，我先生又點會同我周圍飛？全部係佢講啫，係佢同我先生講，話被人強姦、禁錮，覺得好醜，喺台灣時叫我先生陪佢，又叫佢入房陪佢一陣，佢就走去換咗件浴袍，如果我先生係咁猴擒，點解唔即刻嚟？換乜鬼浴袍？點解唔抗拒？人哋有老婆有女，唔該佢唔好破壞人哋嘅幸福家庭，唔使用身體消除唔開心啩？我先生識佢好耐啦，要搞都一早搞咗，有太多疑點啦。」
小雪表示已查過丈夫沒有以私人或公司名義為蔡敏慧在台灣租房，是對方知道其夫住在那兒而自行住在同一酒店，她說：「呢位小姐唔知係咪咁鍾意我先生啦，但我先生好錫我，佢對呢件事好後悔，好驚失去我同BB，所以我原諒咗佢，佢喺台灣返嚟之後都送咗隻鑽石戒指畀我。」
小雪續說：「嗰位小姐係一路以嚟都有搵我先生，人哋有家庭，希望佢唔好騷擾人，將來佢都會有家庭，有第三者介入會點先？佢成日都好性感，我都係人哋父母，見到個女咁會好傷心囉。」對於蔡慧敏指小雪快離婚，她即時否認並說：「冇啲咁嘅事，兩夫婦係要信任，所以我都畀機會佢改過。」
女星高低級都有
小雪又透露婚後也有很多女星致電其夫搵着數，要陳迅元送機票及酒店房間，她說：「啲女星太多啦，乜人都有，有靚有唔靚，高級嘅、低級嘅都有。我先生份人好豪爽，但佢係唔需要人哋付出任何嘢。」她更指對丈夫投以信任票，故不擔心飛來蜢。
採訪：朱倬誼、顏英儀、比華利 攝影：陳慧安
