「四葉女」唐詩詠與無綫新紮男主持崔建邦傳緋聞多時，日前她終於承認二人確在蜜運中，兩人拍拖一年，發展穩定。唐詩詠自言「鈍鈍哋」，男友轉數快可補她不足。
曾是「四葉女」一分子的唐詩詠，早於今年初已跟無綫新紮男主持崔建邦傳緋聞，日前她在油麻地接受本報訪問時，終承認與崔建邦拍拖一年，她提起男友更全程冧笑，難掩熱戀中的滿瀉幸福。
幽默又體貼
去年唐詩詠因為與崔建邦合作主持《K-100》節目而撻着，問她為何會被對方打動芳心？她笑咪咪說：「佢喺說話方面好打動到我，其實真心就得，因為呢行有好多人都係玩玩吓，或者識你無非想拍散拖。」
崔建邦除了有一張嘴與一顆心之外，原來在女友眼中更是優點多多，她說：「佢好有幽默感，唔係只係講嘢𠱁人，佢會畀到你驚喜，佢睇落好似好細個，必要時都會思想成熟，都算體貼嘅。」
唐詩詠續說：「我有啲鈍鈍哋，喺呢行咁耐成日做錯嘢，同佢傾偈係好㗎，我遇到問題都會請教佢，佢轉數好高㗎。我同一個人拍拖，一定要了解對方先，以前太表面啦，覺得呢個人幾好，傾到兩句都OK喎，原來未必得㗎，兩個人拍拖要講緣份，同埋睇嗰個人有冇心。」
常互訴心聲
問唐詩詠對這段情有多少把握？她猶疑片刻說：「好難講，愈諗咪愈衰，由佢自然發展啦，佢係我一個好好嘅傾訴對象，有時佢做嘢有壓力，我會做隻耳仔喺側邊聽佢講。我哋拍拖又唔只係拍拖，大家有時會交流吓做司儀嘅經驗，互相畀意見㖭。」
採訪：朱倬誼 攝影：何榮亮
服裝：Killah 場地：CafeLeJolly
