港股經過周三大跌逾300點後，噚日總算叫做企定，恒指一早就下試14500水平，淡友在低位平倉，大市反覆向上，重上14600，午後升至14650後，大市再震一震，急挫至14580水平，阿虎重以為淡友重施故技，質低恒指迫衍生工具發行商跟沽，好彩大市識得彈，恒指收報14621，升46點。
黑客話，質低恒指迫衍生工具發行商跟沽呢一招好快就冇效，因為市場上的備兌證買賣活動已經靜晒，輪商經過多次被挾，已在對沖方面做足工夫，被迫跟沽或跟買的情況應會減少。
噚日又有一隻宣布供股的股份復牌，就是安利時（339），股價全日跌56%至0.012元，但成交僅25.25萬元。安利時首先40合1，再1供8，每合併股供0.10元，集資720萬元。
建設銀行（939）今日正式招股，管理層今次特別照顧散戶，將每手股數由2000股降至1000股，每股定價由1.90-2.40元，入場費1900-2400元（未計佣金及交易徵費）。i師傅話，今次建行集資額龐大，而招股策略又特別想吸引散戶接貨，從陰謀論角度看，未必是好事。大市最近咁飄忽，美國息口趨升，而油價升與跌都可能被視為利淡因素。此情此景下，建行若以上限2.40元定價，上市後破底一啲唔出奇，所以認購唔到或者獲分派得少亦毋須激氣。
領匯息高吸引
建行上市之後，好快就輪到領匯招股。Cookie叫阿虎要小心資金會從鷹君（041）、太古A（019）、九倉（004）及希慎（014）等收租股流走。不過，阿虎就認為唔少資金會從樓市流向領匯，因為直接買樓收租未必有6%回報，一個唔好彩租咗畀租霸，就更加得不償失。
阿虎