黃昏時候，告士打道東行永遠塞車，坐的士過海（經紅隧），一定要行內欄，外欄啲車入跑馬地，塞死咗，連過海車都阻埋，但走內欄嘅話，一過咗華潤，往往就暢通無阻。政府官員話在海旁填海，連接天橋直達東區走廊，可解告士打道之擠塞。左丁山諗極都唔明，啲車向東行，一旦上咗東區走廊，點樣兜番轉頭入禮頓道、時代廣場、香港仔隧道？跑馬地樽頸係死症，填海於事無補，填嚟做乜？
建築師呢日載我哋由灣仔出嚟，直奔西隧，情願行一個大圈，直奔沙田馬場，費事在告士打道塞車。沿途順風順水，路路暢通，一過咗西隧，踏兩腳油，已到大角嘴，突然間臭味難聞，重以為有人在車上放屁㖭，建築師立即開窗，帶鹹味嘅海風吹入車廂，吹散臭味，風繼續吹，吹呀吹，但用鼻索兩索，知道咯，臭味自海上而來，香港海港久受污染，大角嘴區為了發展豪宅，現稱西九填海地段，就在海邊，海上貨船多的是，污染並不稀奇。海邊一帶，「豪宅」林立，咦，諗真的，豪宅主人要唔好開窗喎，否則價值一萬三千蚊一呎嘅客廳滿是臭海水味，如何豪得起嚟？建築師話：「你都唔識嘅，畀得起萬三蚊一呎，點會唔開大冷氣，終日閂窗，再噴香水吖！」咁又係，我哋畀唔起萬三蚊一呎，卡士唔夠，確係遜人一籌。
好快經過美孚新邨，諗起小時候到荔園玩，到荔枝角灣遊水，恍如昨日。《經濟日報》獨家報道話邱德根想在大嶼山重建荔園，不禁笑到失聲。昔日荔園係二十世紀五十年代形態嘅產品，大笨象靠觀眾餵蕉為生，咁嘅經營態度，可以在二十一世紀生存？真係佩服邱先生嘅勇氣與智慧。建築師話：「邱先生經營亞視，都有辦法賺到錢，有料㗎。」係噃，迪士尼起一個甚麼廁所用咗九百幾萬，畀邱生做，迪士尼建築費或者可以慳番七成以上！