港股前日急跌後，昨日輕微回升。炒友近期碰口碰面都係唉聲歎氣，多數係贏牙籤，輸大杉。個市神神化化，能見度低，可以忽然大散二三百點，揸C輪者喊得一句句，亦可以忽然反彈一二百點，輪到揸P輪者喊三聲。情況唔明朗，都係賭少啲，或者冚半旗，或者只係喺跌得更多之時先至落場，賭C輪與賭P輪都係咁話。
滙控C輪4831：滙控C輪本月到期者有4件，跟住11月第1隻夠鐘嘅係4831。
4831下月1日到期，但最後買賣則係本月26日，剩番9日賭，行使價121.88元，輕微價內（正股122.30元），現價16.4仙，溢價1%，槓桿率74.6倍。夠鐘之時，如果正股冇升冇跌，隻輪會跌到4.2仙，大散74%。正股升到123.52元，隻輪同𠵱家一樣仍值16.4仙。4831點至可以贏1倍？如果正股升上125.16元（即係正股升2.86元），隻輪值32.8仙。隻輪隨時大升大跌。
滙控P輪9212：如果睇淡滙控，最值得博嘅P輪係9212，明年2月中夠鐘，輪價45.5仙，溢價1.5%，槓桿率26.9倍（有效16.3倍），引伸波幅11.3%。
隻輪到期前，滙控會派第3季息略多過1元，所以隻輪溢價只約0.6%。
章盛