大市方向雖然未明，但經紀黃話玩股票唔一定只係炒短線，好多時揸長線先至可以賺大錢，最緊要係明白芬佬個心點諗，識得跟住一齊上車。單睇近排雨潤食品（1068）同埋永樂電器（503）招股受到芬佬追捧，就知道大陸消費股呢一期當紅。
經紀黃又話，如果小初對大陸民營企業有戒心，可以諗下永恩國際（210），皆因佢嘅大陸中低檔鞋類產品零售策略，容易令芬佬受落，雖然隻股過去1年升幅好大，但長線嚟睇仍然OK。
小初記得去年都炒過永恩，如果冇記錯，應該係1元樓下買入，唔夠2元沽咗。隻股上市多年，但講到為芬佬留意，都好似係去年開始嘅事，其中最先睇中佢係金手指，但早排已經賺夠食胡。不過，睇永恩家陣股價仍然企硬喺高位，就知佢仍然獲得其他捧場客支持。
永恩昨日冇起跌，收2.825元，成交股數241萬股，金額683萬元。經紀黃話，買呢類股份唔好諗住可以即食，畀心機坐下貨會有收穫。
慕容小初