無綫新劇《胭脂水粉》眾演員昨日舉行花生騷，最佳男主角大熱門陳豪人氣最強，出場時掌聲雷動，歡呼聲比女主角黎姿、蒙嘉慧更多，成為全場最受歡迎的藝人。而黎姿上台獻唱時則驚到震。
無綫去年的人氣劇《金枝慾孽》曾經舉行宮廷服花生騷，大收宣傳之效，今年另一套以女人權力鬥爭為題材的劇集《胭脂水粉》，昨日亦在沙田新城市廣場舉行「霓裳艷影花生騷」，曾拍檔主演《金》劇的陳豪和黎姿，率領蒙嘉慧、向海嵐、曹敏莉和陳敏芝等，在中樂伴奏下，穿上三十年代的華麗服飾行騷。
憑四劇逐男主角獎
模特兒出身的陳豪，出場時獲觀眾熱烈掌聲，陳豪即除下帽子、露出光頭向觀眾致謝，令台下觀眾嘩然。談到風頭蓋過黎姿，陳豪說：「可能之前咁多女仔行，突然有個男仔出現，再加上我以前係行catwalk，又俾人睇到個光頭，觀眾可能因而有反應。」
日前無綫公布台慶頒獎禮的提名名單，陳豪憑四套劇提名角逐「最佳男主角」，得獎機會甚高，陳豪說：「唔可以咁講，都係睇表現，我覺得自己𠵱家值六十分，重有好多地方要改進，都係搵緊自己嘅階段，初初入行嗰陣野心好大，拍第一套戲《晚9朝5》，覺得自己會攞金像獎最佳男主角，跟住愈做得耐，要求就愈低，𠵱家就算無獎攞，只要觀眾認同我，已經好開心。」
「十年冇上台唱歌」
黎姿雖然風頭遜陳豪，但是仍有一班忠實fans支持，當她唱出《胭》劇插曲時，影迷隨即送花及多袋禮物給她。黎姿說：「今次行騷好緊張，入面得一個更衣室，所以好趕，同埋我成十年冇喺台上唱歌，所以好驚，驚到震，唱完之後，蒙嘉慧攬住我條腰嗰陣，重問我做乜咁震。」
採訪：楊潔雯 攝影：何榮亮
